FLASH- வருகிறது ஐபிஎஸ் மெகா டிரான்ஸ்பர் - முதல்வர் தலைமையில் அவசர ஆலோசனை

தமிழகத்தில் சட்டம் ஒழுங்கு பிரச்சனை அதிகம் விமர்சனத்துக்க்குள்ளாகி வருகிறது. தினம் ஒரு கொலை , கொள்ளை செயின் பறிப்பு கூலிப்படை அட்டகாசம் என பொதுமக்கள் அச்ச உணர்வுடன் வாழும் நிலை ஏற்பட்டுள்ளது.

தமிழகத்தில் சட்டம் ஒழுங்கு சீராக உள்ளதாக முதல்வர் சட்டசபையில் அறிவித்தாலும் நடைமுறையில் பல பிரச்சனைகள் எழுந்து தமிழக அரசு கடுமையான விமர்சனத்துக்குள்ளாகி வருகிறது.

இதற்கு முத்தாய்ப்பாக கடந்த வெள்ளிக்கிழமை நடந்த ஸ்வாதியின் கொலையில் இதுவரை கொலைக்கான காரணத்தை கூட போலீசார் கண்டுபிடிக்காததும் , கொலை விவகாரம் தேசிய அளவில் பெரும் பரபரப்பாக பேசப்படும் விவகாரமாக மாறியுள்ளதும் குறிப்பிடதக்கது.

இதன் விளைவு உயர்நீதிமன்றமும் கடுமையான அதிருப்தியை தெரிவித்துள்ளது. இன்று காலை டிஎஸ்பி விஷ்ணு பிரியா மரண வழக்கு சிபிஐக்கு மாற்றப்பட்டது பெரும் பின்னடைவாக தமிழக முதல்வர் கருதுகிறார்.

இதையொட்டி தமிழக சட்டம் ஒழுங்கு பிரச்சனை குறித்து நேற்று முதல்வர், தலைமை செயலர், உள்துறை செயலர், டிஜிபி உள்ளிட்ட காவல்துறை உயர் அதிகாரிகளுடன் ஆலோசனை நடத்தியதும் அதில் முதல்வர் தனது அதிருப்தியை தெரிவித்ததையும் பதிவு செய்திருந்தோம்,.

நேற்று மாலையும் இதே போல் ஆலோசனை கூட்டம் முதல்வர் இல்லாமல் அதே அதிகாரிகள் நடத்தினர். இதனிடையே இன்று முதல்வர் தலைமையில் மீண்டும் தலைமைசெயலர், உள்துறை செயலர் , டிஜிபி உள்ளிட்ட உயர் அதிகாரிகளுடன் அவசர ஆலோசனை கூட்டம் தலைமை செயலகத்தில் நடக்கிறது.

இதில் டிஎஸ்பி விஷ்ணு பிரியா வழக்கு சிபிஐக்கு மாற்றப்பட்டது , ஸ்வாதி கொலை விவகாரம்  மற்றும் ஐபிஎஸ் அதிகாரிகள் மாற்றம் பற்றி விரிவாக ஆலோசனை நடத்தப்பட்டதாக தெரிகிறது. ஏற்கனவே ஐபிஎஸ் அதிகாரிகள் மாற்றம் முடிவு செய்துள்ள நிலையில் இந்த பிரச்சனையை அடுத்து பெரிய அளவில் ஐபிஎஸ் டிரான்ஸ்ஃபர் செய்ய முதலவர் முடிவு செய்துள்ளதாக கூறப்படுகிறது.

கூட்ட முடிவில் இன்று ஐபிஎஸ் டிரான்ஸ்பர் வெளியாகலாம். இது மிகப்பெரிய அளவிலான மாற்றமாக இருக்கும் என கோட்டை வட்டார தகவல்கள் தெரிவிக்கின்றன.

சென்னை சைக்கிள் போலீஸ் அனுபவ கதைகள்

சென்னை போலீசாருக்கு ரோந்துப்பணிக்காக வழங்கப்பட்ட 250 சைக்கிள்களில் 135 ஸ்டேஷன் காவலர்கள் நேற்று சென்னை முழுதும் இரவுப்பணியில் ஈடுபட்டனர். இது பற்றி அவர்கள் அனுபவத்தை கேட்டு தொகுத்துள்ளோம். Muthaleef.

சென்னையில் கொலை, கொள்ளை, திருட்டு, வழிப்பறி, கூலிப்படை அட்டகாசம்  போன்ற குற்ற சம்பவங்கள் தினம் தினம் நடந்தது வரும் நிலையில் இதெற்கெல்லாம் மகுடம் வைத்தார் போல நுங்கம்பாக்கம் ரயில் நிலையத்தில் இளம் பெண் சுவாதியை வெட்டிக் கொலை செய்யப்பட்ட சம்பவம் நாடு முழுதும் அதிர்வலையை ஏற்படுத்தியுள்ளது.

குற்றவாளியை பிடிக்க முடியாமல் திணறி வரும் சென்னை போலீஸ் உயரதிகாரிகள் திடீரென மேற்கண்ட அனைத்து குற்றங்களுக்கும் ஒரே நிவாரணி என்று ஒரு முறையை கண்டுபிடித்துள்ளனர். அரசு மருத்துவமனையில் எல்லா நோய்களுக்கும் ஒரே மாத்திரை  கொடுப்பதை போல அனைத்து குற்றங்களையும் தடுக்க ஒரே வழி சைக்கிளிங் போலீஸ் எனப்படும் சைக்கிள் ரோந்து திட்டம்.

 ஆட்கள் பற்றாக் குறையில் சிக்கித் தவித்து நிற்கும்சென்னை போலீசுக்கு நேற்று  முதல்வர்  கையால் சீட் கவர் கூட இல்லாமல் 250 சைக்கிளும் 100 இருசக்கர மோட்டார் வாகனமும் வழங்கப்பட்டது. மேலுக்கு நல்ல திட்டம் எனபது போல் தோற்றமளித்தாலும் இது வெகுநாள் நீடிக்க கூடிய திட்டம் அல்ல என்கின்றனர் போலீஸ் வட்டாரத்தில். 

இது பற்றி ஓய்வு பெற்ற காவல்துறை உயர் அதிகாரி ஒருவரிடம் பேசிய போது அவர் கூறியதாவது.

மென் மேனேஜ்மென்ட் எனப்படும் மனித ஆற்றலை முறையாக பயன்படுத்தி குற்றங்களை தடுக்க தேவையான வழிமுறை நடைமுறைகளை பின்பற்றாததால் சென்னை போலீசில் ஏற்கனவே கொடுக்கப்பட்டுள்ள 403 இருசக்கர மோட்டார் வாகனங்களை இயக்கவே காவலர்கள் இல்லை.

 பாதிக்கும் மேற்பட்ட வாகனங்கள் காவல் நிலையத்தில் துருபிடித்துக் நின்று கொண்டிருக்கும் நிலையில், புதிதாக அதுவும் சைக்கிள் கொடுத்துள்ளனர். யதார்த்தம் எனபது குற்றவாளிகள் கையில் எடுக்கும் நவீன வசதிகளை விட கூடுதலாக காவல்துறை எடுத்தால் மட்டுமே குற்றங்களை தடுக்க முடியும். ஆனால் இது போன்று பின்னோக்கி போகும் திட்டங்களால் என்ன புதிதாக விளைய போகிறது என்றால் ஒன்றுமில்லை என்றுதான் சொல்லவேண்டும்.

இரவு நேரங்களில் காவல்துறை சட்டப்படி இரண்டு காவலர்கள் சேர்ந்துதான் ரோந்து அலுவல் செல்ல வேண்டும் ஆனால் அந்த விதிமுறைகளை எல்லாம் காற்றில் பறக்க விட்டு விட்டு ஒவ்வொரு காவலர்களையும் தனித்தனியாக ரோந்து அலுவலுக்கு அனுப்பப்படுகிறது இதனால் மிகப் பெரிய ஆபத்தை சென்னை காவலர்கள் சந்திக்க உள்ளனர். சைக்கிளில் இரவு ரோந்த்து பணியில் தனியாக  செல்லும் காவாலர் பல்வேறு இன்னல்களை சந்திக்க நேரலாம். 

இரவு ஒன்பது மணி முதல் மறுநாள் காலை ஏழு மணி வரை அதாவது பத்து மணி நேரம் சைக்கிளை ஓட்டுவது நடைமுறை சாத்தியம் இல்லாதது ஆனால் 10  மணி நேரம் ஓட்ட  சொன்னதாக தகவல் வந்துள்ளது. இது போன்ற பணிகளில் 40 வயதுக்குட்பட்ட திடகாத்திரமான  இளைஞர்களை பயன்படுத்தலாம் ஆனால்  ஏற்கனவே இதய நோய், ரத்த அழுத்தம் உள்ள 50 வயதிற்கு மேற்பட்டவர்களையும் ஓட்ட சொல்வதுதான் கொடுமை என்கின்றனர் போலீசார்.ஒவ்வொரு காவல் நிலையத்துக்கும் 8 முதல் 10 கி.மீ தூரம் எல்லை இருக்கும்.

தற்போது 135 காவல் நிலையங்களில் இருக்கும் சுமார்  400க்கும் மேற்பட்ட  பைக்குகளை இயக்காமல் சைக்கிளை இயக்குவதால் காவல் துறையின் முதல் பணியான குற்றத்தடுப்பில் மிகப்பெரிய பின்னடைவு ஏற்பட  வாய்ப்புள்ளது. இதன் விளைவு இனிவரும் நாட்களில்  கண்கூடாக காண இருக்கிறோம் இது காவல் துறைக்கும் தமிழக அரசிற்கும் நல்லதல்ல என்று தெரிவித்தார்.

ஒரு திட்டத்தை ஆரம்ப நிலையிலேயே எதிர்ப்பது சரியல்ல இது ஒரு அறிமுக முயற்சிதான், இந்த பணி வெற்றி பெற்றால் மேலும் விரிவு படுத்தப்படும் என்று காவல்துறை உயர் அதிகாரி ஒருவார் தெரிவித்தார்.

டெய்ல் பீஸ்: நேற்றிரவு ரோந்து பணியில் ஈடுபட்ட காவலர்களிடையே மைக்கில்  பேசிய துணை  ஆணையர் ஒருவர் பார்த்து ரோந்து செல்லுங்கள் வேகமாக வரும் வாகனங்கள் மோதி விபத்து எதாவது நிகழ்ந்து விடப்போகிறது. அப்புறம் இந்த திட்டம் பிரச்சனையாகி நின்றுவிட போகிறது என்று எந்திரதனமாக பேசியது காவலர்கள் மத்தியில் பரபரப்பை ஏற்படுத்தியுள்ளது.

செல்பி மோகம் பதவி போச்சு

பாலியல் துன்புறுத்தலுக்கு ஆளான பெண்ணுடன் செல்பி எடுத்த ராஜஸ்தான் மகளிர் ஆணைய உறுப்பினர் ராஜினாமா செய்துள்ளார். -- Muthaleef

ராஜஸ்தான் மாநிலம் ஜெய்பூர் வடக்கு மாவட்டத்தில்  கணவன் மற்றும் இரண்டு சகோதரர்களால் பாலியல் வன்முறைக்கு இரையாக்கப்பட்டு பின்னர் கையில் பச்சை குத்தப்பட்டு   துன்புறுத்தலுக்கு ஆளாக்கப்பட்ட பெண்ணை மஹாலியா காவல் நிலையத்தில் பார்க்க சென்ற ராஜஸ்தான் மாநில மகளிர் ஆணைய உறுப்பினர் சோம்யா குர்ஜர் அந்த பெண்ணுடன் செல்ஃபி எடுத்து கொண்டார். 

அவருடன் ஆணைய தலைவி சுமன் ஷர்மாவும் உடனிருந்தார். இந்த விவகாரம் புகைப்படமாக வாட்ஸ் அப்பில் வெளியாகி விமர்சனத்துக்குள்ளாகியது. இதையடுத்து தேசிய மகளிர் ஆணையம் அவர்கள் மீது விளக்கம் கேட்டுள்ளது. அவர்கள் மீது நடவடிக்கை எடுக்கவும் உத்தரவிட்டது.

இதையடுத்து முதல்வர் வசுந்தரராஜேவை சந்தித்த சோம்யா குர்ஜர் தனது ராஜினாமாவை அளித்தார். சோம்யா குர்ஜரும், தலைவி சுமன் சர்மாவும் ஜூலை 4 அன்று தம்முன் நேரில் ஆஜராகி விளக்கம் அளிக்க தேசிய மகளிர் ஆணைய தலைவி உத்தரவிட்டுள்ளார்.

தான் பாதிக்கப்பட்ட பெண் கேட்டு கொண்டதன் பேரிலேயே படம் எடுத்து கொண்டதாகவும், தன்னால் பிரச்சனை வரக்கூடாது எனபதால் முதல்வரிடம் ராஜினாமாவை அளித்ததாக தெரிவித்துள்ள குர்ஜர், படம்பிடித்து வாட்ஸ் அப்பில் போட்ட அந்த நபர் மீது நடவடிக்கை எடுக்க உள்ளதாகவும் கூறியுள்ளார்.

ஆலோசனை கூட்டம் காய்ச்சி எடுத்த முதல்வர் - கைகட்டி நின்ற உயர் அதிகாரிகள்

தலைமை செயலகத்தில் இன்று நடந்த ஆலோசனை கூட்டத்தில் போலீஸ் உயர் அதிகாரிகளை முதல்வர் காய்ச்சி எடுத்துள்ளார். பதில் சொல்ல முடியாமல் அதிகாரிகள் தலைகுனிந்து நின்றுள்ளனர்.

தமிழகத்தில் கூலிப்படை அட்டகாசமே இல்லை என்று முதல்வர் சட்ட்டசபையில் அறிவித்தார். அன்றைய தினமே வியாசர்பாடியில் ரவி என்ற வழக்கறிஞர் வெட்டிகொலை செய்யப்பட்டார்.  இதற்கெல்லாம் முத்தாய்ப்பாக ஸ்வாதியின் கொலை ஆவேச அலையை எழுப்பி விட்டது.

போலீசாரின் செயல்பாடின்மை, பெருகி வரும் கொலை கொள்ளை, செயின்பறிப்பு சம்பவங்கள் பத்திரிக்கைகளில் , சமூக வலை தளங்களில் பெரிதும் விமர்சனத்துக்குள்ளாகியது. அரசியல் கட்சிகளின் தலைவர்கள் பலத்த கண்டனத்தை தெரிவித்தனர்.

உயர்நீதிமன்றமும் தனது பங்குக்கு இதையெல்லாம் வேடிக்கை பார்க்க மாட்டோம் என்ன நடவடிக்கை எடுத்தீர்கள் என தெரிவிக்க வேண்டும் என கேட்டுள்ளது. அவ்வாறு இல்லாத பட்சத்தில் தானாக முன்வந்து வழக்கை எடுத்து தீர்ப்பளிக்க வேண்டி இருக்கும் என தெரிவித்துள்ளது.

இந்த நிலையில் இன்று காலை காவலர்களுக்கான மோட்டார் சைக்கிள் , சைக்கிள் வழங்கும் பணியை துவக்கி வைத்த முதல்வர் உடனடியாக ஆலோசனை கூட்டத்திலும் கலந்து கொண்டார்.

இந்த ஆலோசனை கூட்டத்தில் தலைமைசெயலாளர் ராம மோகன் ராவ், உள்துறை செயலாளர் அபூர்வா வர்மா, டிஜிபி அஷோக்குமார், கமிஷனர் டி.கே.ராஜேந்திரன், உளவுப்பிரிவு ஐஜி சத்திய மூர்த்தி உள்ளிட்ட உயர் அதிகாரிகள் கலந்து கொண்டனர்.

இந்த கூட்டத்தில் கடுமையான கோபத்தில் இருந்த முதல்வர் ஸ்வாதி வழக்கு போகும் விதம் பற்றி கேட்டுள்ளார். அதற்கு டி.கே.ராஜேந்திரன் விளக்கம் அளித்துள்ளார். ஆனால் அது திருப்தி அளிக்காததால் முதல்வர் சற்று கடுமையாகவே பேசியுள்ளார்.

அதன் பிறகு கோர்ட் விவகாரத்தை எப்படி சமாளிக்க போகிறீர்கள் என்று கேட்டுள்ளார். நீதிமன்றத்தில் வழக்கு எடுப்பதற்கு முன்னர் குற்றவாளியை கைது செய்யவேண்டும் ஆனால் அது நடப்பதாக தெரியவில்லை சிபிஐடிக்கு கவுரவமாக வழக்கை மாற்றி விடலாம் என்று கூறியதாக தெரிகிறது.

பின்னர் காவல்துறையில் காலிபணியிட பிரச்சனை , காவல்துறைக்கான குறைகள் பற்றி பேசிய முதல்வர் அதுபற்றி ஆலோசித்து விரிவான அறிக்கை தரவும் கூறியுள்ளார்.

சுவாதி கொலை விவகாரத்தில் குற்றவாளி இதுவரை கைது செய்யப்படாததில் முதல்வர் கடுமையாக தனது அதிருப்தியை காட்டியுள்ளார். இதற்கு பதில் சொல்ல முடியாமல் அதிகாரிகள் தலையை குனிந்துள்ளனர்.

மீண்டும் மாலையிலும் முதல்வர் அல்லாமல் டிஜிபி , கமிஷனர், கூடுதல் கமிஷனர், உள்துறை செயலாளர் உட்பட அனைவரும் கலந்துகொண்டு ஆலோசனை நடத்தினர். 

கொலையாளி சிக்கினான்? - ஒட்டன்சத்திரத்தில் ஒருவரை தனிப்படை பிடித்தது

ஸ்வாதி கொலை வழக்கில் கொலையாளி சிக்கியதாக உறுதிபடுத்தப்படாத தகவல்கள் வெளியாகி உள்ளது. ஒட்டன் சத்திரம் யூனியன் அலுவலகம் அருகே ஒரு கும்பல் மூன்று  வாலிபர்களை பிடித்து வலுக்கட்டாயமாக வாகனத்தில் ஏற்றியுள்ளது.

அப்போது நடந்த தள்ளு முள்ளுவை பார்த்த பொதுமக்கள் கூடி எதிர்ப்பு தெரிவித்துள்ளனர். வாலிபர்களை ஒரு கும்பல் கடத்த முயல்வதாக பொதுமக்கள் போலீசாருக்கு தகவல் கொடுக்க உடனடியாக லோக்கல் போலீசார் வந்துள்ளனர். 

அவர்கள் காரில் வந்த கும்பலிடம் யார் நீங்கள் ஏன் இவர்களை வாகனங்களில் ஏற்ற பார்க்கிறீர்கள் என்று கேட்டதாக கூறப்படுகிறது. அப்போது போலீசாரிடம் காரில் வந்தவர்கள் தாங்கள் தனிப்படை போலீசார் ஸ்வாதி கொலை வழக்கு விஷயமாக வந்துள்ளோம் என்று கூறியதாக கூறப்படுகிறது.

பின்னர் போலீசார் அவர்களை போக அனுமதித்ததாகவும்  அவர்களில் ஒருவனை மட்டும் தனிப்படையினர் சென்னைக்கு அழைத்து வருவதாகவும் உறுதிபடுத்தப்படாத தகவல் கூறுகிறது. 

ஸ்வாதி கொலையாளிக்கு சூளைமேட்டில் தங்க அடைக்கலம் கொடுத்த நபர் யார் - இரண்டு மணி நேரம் தங்கியிருந்த பின்னர் ஓட்டமா?

ஸ்வாதி கொலையில் போலீசார் தீவிர விசாரணை நடத்தி வரும் வேலையில் பல திடுக்கிடும் தகவல்கள் வெளியாகி உள்ளது.

இந்த கொலை வழக்கில் போலீசார் பல்வேறு கோணங்களில் விசாரணை நடத்தி வருகின்றனர். முக்கியமாக மூன்று கோணத்தில்  விசாரணையை நகர்த்துகின்றனர்.1. காதலன் தரப்பு அல்லது காதல் குறித்த பிரச்சனை, 2. ஸ்வாதியின் குடும்பத்தார் உறவினர் நட்புகள் பக்கம், 3. புதிய கோணத்தில் போலீசார் விசாரணை நடத்துகின்றனர்.

இதில் முதல் கோணத்தில் போலீசார் விசாரித்த வரையில் காதலனே தானாக விசாரணைக்கு வந்ததும், போலீசாருக்கு முழு ஒத்துழைப்பும் தருவதால் போலீசார் விசாரணை அந்தப்பக்கம் தீவிரமாக இல்லை.

மற்றொரு கோணம் ஸ்வாதியின் பக்கம் விசாரணை நடத்துவது, மூன்றாவது கோணம் இதெல்லாம் இல்லாமல் புதிய கோணத்தில் விசாரணையை அணுகுவது. இப்படி அணுகிய போது போலீசாருக்கு புதிய தகவல் கிடைத்துள்ளது.

கொலை நடந்த விதம் கொலையாளி சுவாதியை தாக்கி கொன்ற விதம் பின்னர் கொலையாளி ஸ்வாதியின் செல்போனை குறிப்பாக எடுத்து சென்றது பலத்த சந்தேகத்தை ஏற்படுத்தியுள்ளது. திட்டமிட்டு ஒத்திகை பார்த்து பின்னர் கொலை சம்பபவம் அரங்கேறியுள்ளது தெரிய வந்துள்ளது.

ஸ்வாதியின் செல்போனில் அடங்கியுள்ள தகவல் யாருக்கோ தேவை பட்டுள்ளது, அல்லது ஸ்வாதியினால் அந்த நபருக்கு பாதிப்பு ஏற்பட்டிருக்கும், அல்லது ஸ்வாதியை அழித்தால் அவரது அடையாளத்தையும் அதாவது ஸ்வாதியுடன் தனது தொடர்பு பற்றிய தகவலை அழிக்க வேண்டும் என்று நினைக்கும் ஒரு நபருக்கு இந்த செல்போன் தேவைப்பட்டிருக்கலாம்.

கொலை நிகழ்ந்தவுடன் கொலையாளி எடுத்து சென்ற செல்போனின் டவரை போலீசார் சோதனையிட்ட போது செல்போன் டவர் இரண்டு மணி நேரமாக சூளைமேடு பகுதியிலேயே  காட்டியுள்ளது. காலை 8.30 மணி வரை செல்போன் சூளைமேட்டை தாண்டவில்லை.

இதனால் கொலையாளி கொலை நிகழ்ந்தவுடன் சம்பந்தப்பட்ட செல்போனுடன் சென்றுள்ளான். ஏற்கனவே திட்டமிட்டபடி கொலையாளியை அனுப்பிய நபர் சூளைமேட்டில் எங்காவது ஒரு இடத்தில் அவனை தங்க வைத்திருக்கலாம். இரண்டு மணி நேரம் அங்கு பதுங்கியிருக்கலாம்.

கொலையாளி அந்த நபரிடம் செல்போனை கொடுத்தவுடன் , செல்போனை பெற்ற அந்த நபர் அதன் பதிவுகள் அல்லது தனக்கு தேவையான போட்டோக்களோ, வீடியோவோ அல்லது வேறு எதாவது தகவலோ உள்ளதா என்பதை உறுதி செய்த பின்னர் செல்போனை சுவிட்ச் ஆஃப் செய்திருக்கலாம்  அல்லது உடைத்திருக்கலாம் என்று போலீசார் கருதுகின்றனர்.

அதுவரை அந்த இடத்தில்  அடைக்கலமாகி இருந்த கொலையாளி பின்னர் பாதுகாப்பாக அனுப்பட்டிருக்கலாம். பின்னர் செல்போனுடன் அந்த நபரும் சென்றிருக்கலாம், கூலிப்படை கொலையாளி ரெண்டு மணிநேரம் சூளைமேட்டிலேயே தங்கி இருக்கிறான் என்றால் எல்லாமே திட்டமிட்டு பிளான்படி  நடந்துள்ளது என தெரிகிறது.

கொலையாளியை அனுப்பிய நபருக்கு சூளைமேட்டில் வீடு அல்லது எதாவது நிறுவனம் இருக்கலாம். அல்லது லாட்ஜில் ரூம் எடுத்து தங்கி இருக்கலாம். ஆகவே அந்த கோணத்திலும் விசாரணை நடக்கிறது.

முன்பே திட்டமிட்டு கொலை செய்த பின்னர் அரிவாளுடன் ஓடிய கொலையாளி ரெயில்வே டிராக் அருகில் உள்ள மின்சாரப்பெட்டி பின்புறம் கத்தியை வைத்து விட்டு பிறகு ஒன்றுமே நடக்காதது போல் சென்றுள்ளான். கொலையாளி ஸ்வாதி ரயில்நிலையத்துக்குள் சென்ற பிறகே ரயில் நிலையம் நோக்கி சென்றதும், கொலை செய்தபின்னர் இடது கையில் கத்தியை பிடித்தபடி வேகமாக ஓடிவருவதும் கண்காணிப்பு கேமராவில் பதிவாகியுள்ளது.

பின்னர் கைரேகையை துடைத்துவிட்டு கத்தியை வைத்துவிட்டு செல்வதும் , சூளைமேடு நெடுஞ்சாலையில் செல்வதும் போலீசாரின் புதிய  தேடலில் சிக்கிய கேமரா காட்சி பதிவுகள் தெரிவிக்கிறது.

இதன் மூலம் ஏற்கனவே இதற்கான ஒத்திகையை கொலையாளியும் அவனது சகாவும் செய்திருக்கலாம்,  இரண்டு மூன்று நாட்களுக்கு முந்தைய

காட்சி பதிவுகளை பார்த்தால் உண்மை வெளிப்படலாம் என்பதால் அதற்கான தேடலும் நடந்து வருகிறது.

இதில் குற்றவாளி பிடிபட்டால் அது போலீசாரின் புலன் விசாரணையில் ஒரு மைல்கல்லாக இருக்கும்.

ஸ்வாதி கொலை கமிஷனர் விடிய விடிய விசாரணை - முக்கிய தகவல் கிடைத்ததால் தீவிரம்

தமிழகத்தில் இன்றைய ஹாட் டாபிக்காக மாறிப்போனது ஸ்வாதி கொலை வழக்கு. கொலை நடந்து 6 நாட்கள் ஆகியும் இதுவரை கொலைக்கான காரணம், கொலையாளி பற்றிய தகவல் போன்ற எதையுமே போலீசாரால் கண்டுபிடிக்க முடியவில்லை என்பதே இதன் சோகம். போலீசார் விசாரணை நடத்தினாலும் முட்டு சந்தில் மாட்டிகொண்ட மோட்டார் சைக்கிள் போல் முட்டி கொண்டு நிற்கிறது. இதற்கு முக்கிய காரணம் கொலைக்கான நோக்கம் என்ன என்பதே இதுவரை பிடிபடாதது தான். பெரிய அளவிலான அரசியல் கொலையோ, அல்லது பிரபலமான நபரின் கொலையோ அல்ல  சாதாரணமாக தனியொருவர் பகையால் நடந்த கொலை,இதில் சாதாரணமாக குற்றவாளி சிக்கி இருக்க வேண்டும் ஆனால் இதுவரை சிறு தடயம் கூட கிடைக்கவில்லை. இந்நிலையில் குற்றவாளிகளை பிடிக்கும் அனைத்து முயற்சியிலும் போலீசார் இறங்கி உள்ளனர். கமிஷனரும், கூடுதல் ஆணையரும், இணை ஆணையரும் நேரடியாக விசாரணையில் இறங்கியுள்ளனர் கமிஷனர் நிமிடத்திற்கு நிமிடம் விசாரணையை கண்காணித்து தேவையான உத்தரவுகளை பிறப்பித்து வருகிறார். கமிஷனரே நேரடியாக விசாரணையிலும் ஈடுபட்டுள்ளார். முதல் கட்டமாக ஸ்வாதியின் தந்தையிடம் விசாரணை நடத்திய கமிஷனர் டி.கே.ஆர், நேற்று இரவு திடீரென நுங்கம்பாக்கம் காவல் நிலையத்துக்கு நேரில் வந்தார் அங்கு நள்ளிரவு 1 மணி வரை சிலரிடம் நேரிடையாக விசாரணை நடத்தினார். கமிஷனரே நேரிடையாக விசாரணையில் இறங்கியது போலீசாரிடையே பரபரப்பை ஏற்படுத்தியுள்ளது. சுவாதியின் நண்பர்கள் மற்றும் சந்தேகப்படும் நபர்களிடம் அவர் விசாரணை நடத்தினார். விசாரணையின் முக்கிய கட்டத்தை நெருங்கி விட்டதாக காவல் துறையினர் தெரிவித்துள்ளனர். சில அடிப்படையான தகவல்கள் போலீசாருக்கு கிடைத்துள்ளதால் விசாரணை தீவிரமடைந்துள்ளது.